سالارِ افواجِ پاکستان جنرل سید عاصم منیر نے ”یوم سیاہ“ پر توڑ پھوڑ کے مرتکب افراد کو انصاف دلانے کا عزم کیا

پشاور میں کور ہیڈ کوارٹرز کے دورے میں، سالارِ افواجِ پاکستان (چیف آف آرمی اسٹاف) جنرل سید عاصم منیر احمد شاہ نے اس بات کو یقینی بنانے کے پختہ عزم کا اظہار کیا کہ 9 مئی کے یوم سیاہ پر ہونے والی توڑ پھوڑ میں ملوث تمام افراد کو کیفرکردار تک پہنچایا جائے۔ انصاف کے لیے مسلح افواج، کسی بھی صورت میں، اپنی تنصیبات کے تقدس اور سلامتی کی مزید خلاف ورزیوں یا توڑ پھوڑ کی کارروائیوں کو برداشت نہیں کریں گی۔ سپہ سالار نے اس دن رونما ہونے والے تباہ کن واقعات کے منصوبہ سازوں، حوصلہ افزائی کرنے والوں، اکسانے والوں اور عمل کرنے والوں کو پکڑنے اور ان کے خلاف کارروائی کرنے کی ضرورت پر زور دیا۔

القادر ٹرسٹ کیس میں 9 مئی کو پی ٹی آئی کے چیئرمین عمران نیازی کی گرفتاری کے بعد ملک بھر میں پرتشدد مظاہرے پھوٹ پڑے جن کی قیادت پاکستان تحریک انصاف (پی ٹی آئی) کے پارٹی کارکنوں نے کی۔ ان مظاہروں کے نتیجے میں لاہور کور کمانڈر ہاؤس اور جنرل ہیڈ کوارٹرز (جی ایچ کیو) سمیت عوامی املاک کو خاصا نقصان پہنچا اور فوجی تنصیبات کو نشانہ بنایا گیا۔ افسوسناک طور پر، بدامنی کے نتیجے میں کم از کم دس جانیں ضائع ہوئیں، متعدد افراد زخمی ہوئے۔ مزید برآں، حفاظتی اقدامات کے تحت انٹرنیٹ خدمات 72 گھنٹے سے زائد معطل رہیں۔

مسلح افواج نے 9 مئی 2023 کو پیش آنے والے واقعات کی مذمت کی اور اسے ملکی تاریخ کا ایک سیاہ باب قرار دیا۔ بین الخدماتی تعلقات عامہ (انٹر سروسز پبلک ریلیشنز) نے ایک بیان جاری کیا جس میں فوج پر مربوط حملوں کی مذمت کی گئی، پی ٹی آئی رہنماؤں کو ”منافق“ قرار دیتے ہوئے کہا گیا کہ وہ اپنے کارکنوں کو مسلح افواج کے خلاف اکسانے کے ساتھ ساتھ تعریف کے اظہار کے ذریعے اپنی تنقید کو چھپانے کی کوشش کر رہے ہیں۔

فوجی جوانوں کے ساتھ اپنی مصروفیات کے دوران، سالارِ افواج جنرل حافظ منیر احمد نے کور افسران سے خطاب کیا اور قومی سلامتی کو درپیش خطرات پر زور دیا۔ انہوں نے امن اور استحکام کے عزم پر زور دیتے ہوئے کہا کہ اس عمل میں خلل ڈالنے والوں کے لیے کوئی گنجائش نہیں ہوگی۔ سپہ سالار نے معلوماتی جنگ (انفارمیشن وارفیئر) سے درپیش مشکلات اور دشمن عناصر کی مسلح افواج کو نشانہ بنانے کی دانستہ کوششوں پر روشنی ڈالی۔ تاہم، انہوں نے پاکستانی عوام کے تعاون سے ایسی مذموم کوششوں کو ناکام بنانے کا عہد کیا۔

مزید برآں، جنرل سید منیر نے موجودہ حفاظتی (سیکیورٹی) صورتحال اور انسداد دہشت گردی کی جاری کوششوں کے بارے میں ایک جامع تشریح (بریفنگ) حاصل کی۔ انہوں نے دہشت گردی کے خلاف انتھک جنگ میں قانون نافذ کرنے والے اداروں کی پیشہ ورانہ قابلیت، کارکردگی اور کامیابیوں کو سراہا۔